Facebook in die sop oor private boodskappe

2012-09-25 11:20

Parys – Die Franse regering het Dinsdag gesê hy het bestuurders van Facebook ingeroep om meer duidelikheid te gee oor bewerings dat sommige gebruikers se private boodskappe op dié webwerf sigbaar is vir al hulle vriende.

Arnaud Montebourg, minister van nywerheidsvernuwing, en Fleur Pellerin, junior minister vir die digitale ekonomie, het gesê Facebook-bestuurders is ingeroep om voor die Franse datawaghond, CNIL, te verskyn oor die bewerings.

"Duidelike en deursigtige verduidelikings moet sonder versuim gegee word," het hulle in die verklaring gesê.

Facebook het Maandag gesê hy het klagtes deur gebruikers ondersoek en het ontken dat private boodskappe openbaar gemaak word.

"'n Klein aantal gebruikers het hul kommer uitgespreek ná wat verkeerdelik aangesien is vir persoonlike boodskappe op hul blaaie gepubliseer is," het woordvoerders van die maatskappy aan die nuusagentskap AFP gesê.

"Ons ingenieurs het hierdie bewerings ondersoek en het gevind dat dit ouer statusboodskappe is wat nog altyd sigbaar was op gebruikers se profielblaaie."

– Volg Nuus24 op Twitter.

- AFP