'Facebook hits vrouehaat aan'
2011-09-20 07:05
Pretoria – Facebook-blaaie wat seksuele geweld aanmoedig, skep ’n omgewing waarin vrouehaat floreer.
So het mnr. Mbuyiselo Botha, woordvoerder van die Sonke Gender Justice Network, Maandag gesê in reaksie op ’n aanlynpetisie wat Facebook vra om dié blaaie te sluit.
Die petisie is begin deur John Raines van Florida in die VSA op Change.org, ’n organisasie wat ’n webwerf met internetversoekskrifte bedryf.
Shelby Knox van Change.org het gister in ’n verklaring gesê meer as 135 000 mense in 77 lande het reeds by die veldtog aangesluit.
“Facebook se diensvoorwaardes stel dit onomwonde dat haatspraak en die aanhitsing van geweld verbode is en verwyder sal word,” lui die verklaring.
Daar is egter blaaie soos “Raping and Killing Your Girlfriend as a Joke” en “Abducting, raping and violently murdering your friend, as a joke” wat tienduisende aanhangers het.
Volgens aktiviste gebruik sommige aanhangers dié blaaie as ’n forum om te praat oor verkragtingfantasieë en om wenke te kry oor hoe om dit uit te voer.
Raines het die veldtog van stapel laat loop nadat aanlyn-aktiviste vergeefs Facebook se interne aanmeldingstelsel probeer gebruik het om die blaaie te laat verwyder.
“Die blaaie is ’n objektivering van vroue en gee die idee dat hulle net beskikbaar is vir mans se behoeftes en begeertes,” het Botha gesê. “Ek dink die petisie is ’n uitstekende inisiatief.”
– Volg Nuus24 op Twitter
- Beeld