Facebook betree stryd teen kinderpornografie
2011-05-23 10:15
Kaapstad – Facebook het pas tot die stryd teen kinderpornografie toegetree.
’n Program genaam PhotoDNA gaan die miljoene foto’s wat daagliks op
dié sosiale netwerk gelaai word, ontleed en kinderpornografie-foto’s
uitwys.
Die program is die afgelope drie jaar deur Microsoft en Hany
Farid van die Dartmouth College in Hanover in New Hampshire, Amerika,
ontwikkel.
Farid is ’n deskundige op die gebied van forensiese ontleding van digitale beelde.
Elke foto of beeld wat op die internet gelaai word, kry ’n huts(#)-kode wat so uniek soos ’n mens se vingerafdruk is.
Elke keer wanneer die foto herlaai of ’n bietjie verander word,
soos om die grootte te verander, verander die kode. Dit maak dit baie
moeilik om twee foto’s wat presies dieselfde lyk met mekaar te vergelyk.
PhotoDNA maak die kode sterker sodat selfs gemanipuleerde foto’s vergelyk kan word.
Elke foto word na swart en wit verkleur, die grootte word ook verander en dit word in blokke verdeel.
Elke blokkie het ’n histogram van intensiteitsgradiënte.
Die DNS word deur dié gradiënte saamgestel. Hoewel foto’s nie weer
uit hul DNS saamgestel kan word nie, kan foto’s met soortgelyke DNS
geïdentifiseer word.
Omdat die data in die DNS so min is, kan dit binne 4 millisekondes pasmaats in groot datastelle vind.
Kinderpornografie van kinders jonger as 13 jaar sal in die National
Center for Missing and Exploited Children (NCMEC) in Virginia, Amerika,
elkeen ’n kode ontvang en dit sal as basis gebruik word om
Facebook-foto’s te vergelyk.
Die program is ook uiters sensitief. In die toetsfase is net een
uit elke 10 miljard foto’s verkeerdelik as pornografies aangedui.
Farid het gesê deur die program te fokus op kinders wat nog nie
puberteit bereik het nie, kan hulle met groter sekerheid weet daar word
nie ruimte gelaat vir misverstande of foute nie.
Foto’s wat as kinderpornografie uitgeken word, word onmiddellik by
die NCMEC aangemeld, van die webblad verwyder en 90 dae lank gehou.
Indien die maatskappy nie ’n wettige aansoek om die terugbesorging van die foto’s kry nie, word dit gewis.
Dié sentrum het sedert 2003 amper 30 miljoen beelde en video’s van kinderpornografie ontleed.
Volg Nuus24 op Twitter.
- Volksblad