FNB se aanlynbankdienste weer normaal

2012-03-23 13:04

Duncan Alfreds

Kaapstad – First National Bank (FNB) se aanlynbankdienste is besig om ná 'n stelselwye kragonderbreking na normaal terug te keer.

In 'n e-pos Donderdag het FNB erken dat sommige kliënte gefrustreerd was met die aanlynbankdienste.

"Soos julle weet, het ons Dinsdag kragonderbrekings by ons datasentrums ervaar wat 'n onderbreking by ons bankstelselsveroorsaak het."

Dr. Michael Jordaan, uitvoerende hoof van FNB, het gesê probleem was ’n kragonderbreking in Randburg en dat die rugsteun- ononderbroke kragtoevoer (UPS) nie ingeskop het nie, het Die Burger vroeër berig.

Raj Makanjee, FNB se tegnologiehoof, het in ’n verklaring gesê die kragtoevoer in Randburg het Dinsdag teen 17:00 erg gewissel en dit het die bank se ononderbroke kragtoevoer vir ’n kort rukkie geraak. Gevolglik is die stelsel afgeskakel om verdere beskermingsmaatreëls in te stel.

“Bankstelsels is gedurende die vroeë ure van die aand herstel en funksionaliteit is van 21:30 teruggebring.”

Alle stelsels is weer in die nag nagegaan en daar is bevestig dat dit gister gewerk het, het Makanjee gesê.

– Volg Nuus24 op Twitter.

- News 24