Europa soek meer hormoonvrye vleis

2012-02-27 14:16

Windhoek – Die Europese parlement gaan binnekort stem om die tariefvrye kwota vir hormoonvrye beesvleis met 48 200 ton per jaar te verhoog, het die Republikein Maandag berig.

Beesvleisprodusente staar groter mededinging binne die Europese mark in die gesig weens ’n voorstel om die kwota vir tariefvrye invoer van hormoonvrye beesvleis uit ander lande met duisende ton per jaar te verhoog.

Dit volg nadat die internasionale handelsforum van die Europese parlement in Januarie ’n voorstel van die Europese Kommissie (EC) aanvaar het om die kwota van hoë gehalte, hormoonvrye beesvleis met 48 200 ton per jaar te verhoog. Die parlement sal tydens sy sitting op 13 Maart daaroor stem.

Die besluit is geneem om die twintig jaar lange oorlog tussen Europa en die VSA  en Kanada oor die verbod op die invoer van hormoonryke beesvleis te beëindig.

Indien die voorstel aanvaar word, sal lande wat die Konvensie vir die Organisasie van Ekonomiese Samewerking en Ontwikkeling (OECD) onderteken het, hul hormoonvrye beesvleis tariefvry na die Europese mark kan uitvoer.

Kliek hier vir die volledige artikel.

– Die Republikein