Erotiese Picasso-werk laat die dollars inrol
2012-11-09 08:20
New York – Een van Pablo Picasso se olieskilderye van sy minnares en muse, Marie-Therese Walter, het vir $41,5 miljoen (sowat R360 miljoen) in Manhattan, New York, verkoop.
Die erotiese kunswerk, "Nature morte aux tulipes," wat in 1932 geskep is, vertoon die vrou tussen tulpe en vrugte.
Die skildery was deel van Sotheby's se impressionistiese- en moderne versameling.
Afslaers het vooraf beraam dat die skildery vir tussen $35 miljoen (ongeveer R304 miljoen) en $50 miljoen (sowat 434 miljoen) sal verkoop.
'n Ander skildery van die Marie-Therese-reeks, "Femme a la fenetre," het $17,2 miljoen (sowat R14,9 miljoen) behaal.
Dit was ten spyte van dié suksesse 'n moeilike aand vir Sotheby's, met 30% van die items wat onder die hamer gekom het wat nie verkoop is nie.
– Volg Nuus24 op Twitter.
- Sapa - AFP
