Entstof teen grootste kindersiekte in Kenia
2011-02-14 14:27
Nairobi - Kenia het een van die eerste Afrika-lande geword wat ‘n roetine-entstof teen pneumokokkale siektes, waaraan meer as ‘n halfmiljoen kinders onder vyf elke jaar doodgaan, bekendgestel het.
Honderde kinders het tydens ‘n seremonie in Nairobi, wat ook deur pres. Mwai Kibaki bygewoon is, hulle eerste inspuitings gekry.
“Die entstof teen pneumokokkale siektes kan ons help om die sterftesyfer van kinders wat aan longontsteking doodgaan aansienlik minder te maak. Die siekte is verantwoordelik vir miljoene sterftes regoor die wêreld,” het Anthony Lake, die hoofdirekteur van die Verenigde Nasies se kinderagentskap, Unicef, in ‘n verklaring gesê.
Volgens die Globale Alliansie vir Inentings en Immunisering (GAVI) sterf meer as ‘n miljoen mense elke jaar as gevolg van pneumokokkale siektes. Dit is verantwoordelik vir 18% van kindersterftes in ontwikkelende lande en raak ook kinders in ander dele van die wêreld.
GAVI hoop om die entstof binne die volgende jaar aan 19 ontwikkelende lande soos Nicaragua, Guyana, Jemen en Sierra Leone, voor te stel. Teen 2015 hoop die organisasie om die entstof in meer as 40 lande in gebruik te hê.
-Volg Nuus24 op Twitter.
-SAPA