Egiptiese weermag nou op Facebook
2011-02-18 21:00
Kaïro – Die hoër raad van die Egiptiese weermag het ‘n Facebook-groep gestig wat teen Vrydag meer as 66 000 volgers gehad.
Die weermag, wat nou in beheer van die land is, het die groep gestig in ‘n poging om na Egiptiese jongmense uit te reik wat die 25 Januarie-betogings begin het.
Dié betogings het tot die bedanking van president Hosni Mubarak, wat vir byna 30-jaar die land regeer het, gelei.
Die groep is gestig “omdat ons glo dat suksesvolle samewerking tussen ons en die jeug in die komende tydperk tot sekuriteit en stabiliteit in ons geliefde Egipte kan lei,” het ‘n boodskap op die groep se blad gesê.
Egiptiese aktiviste het die anti-regering betogings deur sosiale netwerke soos Facebook en Twitter gereël. Die weermag het tot op datum nog nie ‘n Twitter-blad geskep nie.
-Volg Nuus24 op Twitter.
-SAPA