Egipte kry graftombe terug
2009-10-28 00:12
Kaïro - New York se Metropolitaanse Museum vir Kunswerke gaan ‘n deel van ‘n antieke faraoniese graftombe wat hulle by ‘n versamelaar gekoop het, aan Egipte terug besorg.
Die Egiptiese Opperraad vir Antikwiteit het gesê ‘n gedeelte van ‘n rooi graniet graftombe, bekend as die naos, was verlede jaar Oktober by ‘n versamelaar van antieke ware gekoop sodat dit na Egipte kan terugkeer.
Die fragment sal Donderdag in Egipte aankom.
Egle Zygas, die hoof-skakelbeampte by die Met het die museum se besluit bevestig.
Egipte se hoof oor antikwiteite, Zahi Hawass het die Met se besluit geloof en dit beskryf as ‘n “goeie daad”.
Dit is die eerste keer dat ‘n item aangekoop word met die doel om dit te repatrieer.
Die fragment behoort aan die naos van koning Amenemhat I wat dateer uit die 12de dinastie.
Dié koning het sowat 4000 jaar gelede regeer en word tans in die Ptah-tempel van Karnak in Luxor bewaar.
Hawass, die Egiptiese argeologiese ghoeroe, is die afgelope paar maande besig met ‘n veldtog om alle antieke ware wat van museums in Egipte gesteel is, terug te kry.
Hawass het sowat 5000 Egiptiese kunswerke en antieke ware teruggekry sedert hy in 2002 hoof oor antikwiteite geword het.
Egipte het ook die bostuk van koningin Nefertiti van Duitsland teruggeëis, wat in Desember 1912 op die oewers van die Nyl deur die Duitse argeoloog Ludwig Borchardt ontdek is.
- Sapa-AP