Dwelms beter as drank, sigarette
2009-10-29 15:18
Londen – Alkohol en sigarette is meer gevaarlik as onwettige dwelmmiddels soos dagga, LSD en ecstasy (metileendioksimetamfetamien), het die Britse regering se top dwelm-navorser Donderdag gesê.
Prof. David Nutt van die Imperial College in Londen het 'n beroep gedoen vir 'n nuwe stelsel om dwelms mee te klassifiseer en sodoende die publiek toe te laat om die skade wat wettige en onwettige dwelms aanrig, beter te verstaan.
Alkohol sal as die vyfde mees skadelike dwelm, net na heroïne, kokaïne, barbiturate en metadoon geklassifiseer word.
Volgens Nutt sal tabak in die negende plek val en dagga, LSD en ecstasy val op 11de, 14de en 18de vlak, ten spyte daarvan dat dit onwettige dwelmmiddels is.
Dié ranglys is op die fisiese skade, afhanklikheidsvlak en sosiale skade van die middels baseer.
"Niemand stel voor dat dwelms nie skadelik is nie, maar hierdie gaan oor die skaal van die skade wat gedoen kan word,” het Nutt gesê.
Volgens hom is daar reeds aanvaar dat jong mense daarvan hou om met dinge, insluitende dwelms, te eksperimenteer, en dit is belangrik om hulle te beskerm tydens hierdie fase van hul lewens.
"Om hierdie rede moet ons meer akkurate inligting verskaf. As jy dink dit gaan jeugdiges afskrik, is jy tien teen een verkeerd,” het hy gesê.
Alhoewel Nutt erken dat dagga skadelik is, sê hy dit lei nie na grootskaalse gesondheidsprobleme nie. Hy het ook vroeër vanjaar oproering veroorsaak toe hy gesê het dat ecstasy net so gevaarlik soos perdry is.
- Sapa