'Dumb Ways to Die' treffer op YouTube

2012-11-21 11:22

Melbourne – 'n Video waarin tekenprentkarakters op verskillende maniere sterf, is reeds meer as 12 miljoen keer op YouTube gekyk.

Dié video is deel van 'n veiligheidsveldtog deur die Australiese departement van vervoer.

Die video "Dumb Ways to Die" is op verskeie sosiale netwerke versprei sedert dit sewe dae gelede op YouTube geplaas is.

In die video sterf die karakters in onwaarskynlike omstandighede – een van die karakters verkoop selfs albei sy niere op die internet.

Die departement en die vervaardiger van die video, John Mescall, is verbaas dat die video so gewild is.

"Die besluit om 'n morbiede onderwerp te kombineer met iets oulik, is wat die video snaaks maak," het Mescall aan die Australiese bemarkingswebwerf mUmbrella gesê.

"Dit is 'n advertensie wat nie soos 'n advertensie voel nie. Dis prettig, laf, slim en meer as ongewoon. Dit is die ontasbare dinge wat so moeilik is om te rasionaliseer, maar wat so belangrik is."

Kyk hier na die video:



– Volg Nuus24 op Twitter

- AFP