Duitse politikus vaar uit oor Facebook
2010-04-06 14:44
Berlyn - Duitsland se minister van verbruikersbeskerming, Ilse Aigner, het skerp kritiek uitgespreek oor die wyse waarop Facebook-gebruikers se persoonlike data deur die sosiale webwerf hanteer word.
Aigner het Mark Zuckerberg, Facebook se vader en uitvoerende bestuurder, Maandag in 'n ope brief dringend gevra om privaatheid op die webwerf op te skerp.
Die minister het haar brief aan Associated Press gestuur in reaksie op moontlike veranderinge aan die privaatheidsparameters op Facebook.
Aigner dring daarop aan dat Facebook-gebruikers se persoonlike besonderhede nie aan derdeparty-maatskappye beskikbaar gestel word vir kommersiële redes sonder gebruikers se medewete nie.
"Persoonlike besonderhede moet privaat bly," het sy geskryf. "Facebook respekteer nie hierdie wens nie."
Die minister het gedreig om haar Facebook-rekening toe te maak as die internetmaatskappy nie die beplande veranderinge wysig nie.
- Sapa-AP