Drink dié glasie wyn vir rumatiek
2013-01-22 08:49
Sydney – Die moontlike gesondheidsvoordele van rooiwyn is in onlangse jare dikwels beklemtoon, maar 'n Australiese biochemikus het opnuut die aandag getrek met 'n nuwe wynproduk wat só gelaai is met antioksidante dat dit gebruik kan word om 'n hele rits kwale te behandel.
Greg Jardine van Brisbane het 'n mengsel gepatenteer wat as anti-inflammatoriese middel dien en ook toestande soos rumatiek en chroniese moegheid kan verlig.
"Ons neem hierdie anti-oksidant, wat in lae vlakke in wyn voorkom, na 'n vlak waar dit iets kan doen," het hy Dinsdag aan AFP gesê.
Jardine het gesê wyn wat met antioksidante gelaai word, is gewoonlik nie aangenaam om te drink nie; wanneer dié antioksidante egter meer oplosbaar is in vet, is dit meer drinkbaar.
Sy drankie word gemaak met die gewone wynmaakproses, maar sekere dele van die proses is meer intens, verduidelik hy.
"Ons doen niks anders as die gewone wynmaakproses nie; ons bottel super-droeë wyn is net 'n gewone rooiwyn," het hy gesê.
Jardine hoop dat sy proses ook in die vervaardiging van ander drankies en voedsel gebruik kan word, en sê dit kan selfs moontlik wees om lekkergoed of bier te maak met gesondheidsvoordele.
Lindsay Brown, 'n wetenskaplike wat Jardine se mengsel by die Universiteit van Suid-Queensland getoets het, het gesê veral rotte met rumatiek het in toetse baie goed gevaar.
"Dit voorkom heeltemal die inflammasie, en die swelling en styfheid in die bene," het hy gesê. Toetse is vroeg in 2012 gedoen.
– Volg Nuus24 op Twitter.
- AFP
