Dotcom kan polisie vir miljoene dagvaar
2012-12-06 10:47
Wellington – Die internetentrepreneur Kim Dotcom kan Nieu-Seeland se polisie en intelligensiediens dagvaar oor sy inhegtenisname in verband met sy betrokkenheid by die omstrede webwerf Megaupload, het 'n Nieu-Seelandse regter Donderdag beslis.
Regter Helen Winkelmann het beslis dat die Nieu-Seelandse kommunikasiesekerheidsburo as getuie in die saak geroep kan word, wat effektief beteken dat die Magaupload-stigter toegang sal hê tot die inligting wat oor hom versamel is.
Die kommunikasiesekerheidsburo het vroeër aangevoer dat die inligting geheim gehou moet word.
Die buro het September bevestig dat hy Dotcom begin dophou het op grond van foutiewe inligting van die polisie dat hy nie 'n permanente inwoner in die land was nie.
Die regter het Donderdag beslis dat Dotcom skadevergoeding kan eis vir die klopjag op sy huis toe hy in Januarie in hegtenis geneem is.
Sy regsverteenwoordiger, Paul Davison, het nie gesê hoeveel skadevergoeding Dotcom sal eis nie. Winston Peters, leier van Nieu-Seeland se First-party, het gesê die eis kan miljoene beloop: "Dit gaan ons, almal van ons, moontlik honderde miljoene dollars kos."
"Dis 'n tragedie vir die mense van Nieu-Seeland, behalwe as jy daarvan hou om te betaal vir iets wat nie ondersteuning verdien nie," het Peters gesê.
Dotcom is op borgtog vry, en wag op 'n verhoor om te beslis of hy aan Amerikaanse owerhede uitgelewer kan word in verband met aanklagte van vervalsing, geldwassery en rampokkery.
Intekenaars het Megaupload gereeld gebruik om vervalste digitale materiaal uit te ruil.
– Volg Nuus24 op Twitter.
- SAPA
