Dooie jong walvis spoel by Beachview uit
2010-07-03 09:51
Die Burger
Port Elizabeth – ’n Dooie boggelrugwalvis het by die Beachview-oord uitgespoel.
Volgens Lloyd Edwards, eienaar van Raggy Charters, is die walvis minstens twee jaar oud en tien meter lank.
“Dit was ’n onvolwasse walvis, wat moontlik deur ’n skip gestamp is. Ek het ook gesien ’n haai het ’n groot hap net agter die vin gevat, maar dit is nie waaraan die walvis dood is nie.”
Me. Adel van Rensburg, mede-eienaar van Nitrous-sekuriteit in Seaview, het gister gesê een van haar kliënte het haar omstreeks 07:00 laat weet van die walvis wat ’n ent die see-in gelê het.
“Maar toe ek om 10:00 gaan kyk het, het die walvis reeds op die strand uitgespoel.
“Dit het nie regtig daar gestink nie. Eers toe ek in die kar geklim het, kon ek die verrotting ruik. Dit is eintlik baie hartseer. Die walvis was nog so klein.”
Luncedo Njezula, woordvoerder van die Nelson Mandelabaai-munisipaliteit, het gesê die karkas is reeds verwyder.
“Ons het Xtreme Projects gekontrakteer om die walvis te verwyder. Hulle gaan die karkas opkap en na Kuduskloof vat om te verbrand.”
Volgens Edwards is daar geen ooglopende verband tussen hierdie walvis en die een wat onlangs by by St. Francisbaai uitgespoel het nie. “Dit is maar hoe die natuur is. Die sterkste sal oorleef. Ons weet ook die walvisse trek nou oos om te gaan kalf.”
Volg Nuus24 op Twitter.
- Die Burger