Dodelike bakterieë deur selfone oorgedra
2011-10-18 10:07
Londen – Een uit elke ses selfone in Brittanje is met fekale stof besmet en die bakterieë daarin kan uiters ongesond wees.
Navorsers van die Universiteit van Londen het bevind die E.coli-bakterieë wat op selfone gevind is, is daar as gevolg van hul eienaars se swak gewoontes in die badkamer.
Die selfoongebruikers was nie na besoeke aan die badkamer hul hande behoorlik nie, het die studie bevind.
Die bakterieë, wat in fekale stowwe gevind word, kan mae ontstel, voedselvergiftiging veroorsaak en in sommige gevalle selfs dodelik wees.
“Die feit dat E.coli op so baie selfone gevind word, bewys dit is ‘n landswye probleem,” het Ron Cutler van die universiteit gesê. “Mense sê hulle was hul hande gereeld, maar die wetenskap weerspreek hulle.”
Sowat 92% van selfone en 82% van hande wat die navorsers ondersoek het, is met E.coli besmet.
Die fekale bakterieë kan ure lank na badkamerbesoeke op die hande oorleef, het die navorsers gesê.
Dit word ook maklik oorgedra vanaf deurhandvatsels, kos en ook selfone.
– Lees meer hier.
– Volg Nuus24 op Twitter.