Dit is beter om op 21 te begin drink, meen talle
2011-07-08 09:08
Kaapstad - Twee derdes van Suid-Afrikaners glo volgens ’n peiling dat minderjarige alkoholmisbruik sal afneem as die wettige ouderdom vir alkoholinname tot 21 verhoog word.
Dit blyk uit ’n peiling oor alkoholmisbruik wat die maatskappy Synovate onlangs onder 500 respondente in Kaapstad, Johannesburg en Pretoria gedoen het.
Die opname kom nadat daar vroeër vanjaar voorgestel is die ouderdom waarop mense drank mag koop in Suid-Afrika moet van 18 tot 21 verhoog word.
Abraham Phahlamohlaka van die departement van maatskaplike ontwikkeling het vroeër vanjaar gesê ’n dokument met voorstelle oor dié en ander alkoholverwante kwessies sou aan ’n interministeriële komitee oor middelmisbruik voorgelê word.
Die kwessie word glo nog bespreek.
“Die peiling demonstreer die publiek se besorgdheid oor alkoholmisbruik en steun vir die regering se voorgestelde planne om dit teen te werk,” het mnr. Jake Orpen, besturende direkteur van Synovate, gesê.
Van die 500 mense wat ondervra is, het 56% al van die voorstel gehoor, terwyl 44% onbewus was dat die wettige ouderdomsperk heroorweeg word.
Die meerderheid respondente (62%) glo dronkbestuur en gewelddadige gedrag soos huishoudelike geweld kan afneem as die (moontlike) wet goedgekeur word.
In ’n verrassende wending is die grootste optimisme oor die doeltreffendheid van die voorstel om minderjarige alkoholgebruik te verminder onder respondente tussen die ouderdomme van 21 en 24 ondervind. Respondente van tussen 18 en 20 was egter nie daarvan oortuig nie.
Die peiling het ook bevind nege uit tien respondente uit alle ouderdomsgroepe stem saam dat minderjarige alkoholmisbruik ’n probleem is in Suid-Afrika. Altesaam 61% van die respondente het gesê hulle is aan minderjarige alkoholgebruik blootgestel.
Die massamedia sal sowat R1,8 miljard aan advertensie-inkomste verloor as die regering ’n verbod op alkoholverwante advertensies plaas, blyk uit ’n studie deur Chris Moerdyk, ’n onafhanklike bemarkings- en media-analis.
Sy studie het ook onder meer bevind sowat 2500 werknemers met ’n lae inkomste kan hul werk verloor.
– Volg Nuus24 op Twitter
- Die Burger