Dieet maak honger 'permanent' erger
2011-10-28 12:01
New York – Selfs ‘n jaar nadat jy met ‘n streng dieet die vetrolletjies kon afskud, beveel hormone jou om te: “Eet, eet, eet!”
Die bevindinge wys mense wat na ‘n streng dieet weer gewig opgetel het, verval nie noodwendig weer in slegte gewoontes nie, maar sukkel liewer teen ‘n aanhoudende biologiese drang.
“Mense wat die gewig weer optel moet nie te hard op hulself wees nie,” het die navorser Joseph Proietto van die Universiteit van Melbourne in Australië gesê. “Eet is ons mees primitiewe instink.”
Om die teorie te staaf, het die navorsers vrywilligers ‘n streng dieet laat volg. Die vrywilligers het gemiddeld sowat 14 kg in die eerste 8 weke verloor met behulp van ‘n plaasvervanger vir ‘n maaltyd, Optifast, en groente voor hulle die laaste twee weke weer 'n normale eetprogram gevolg het.
Selfs met berading oor hoe om die gewig af te hou, het die vrywilligers oor 12 maande gemiddeld 5 kg opgetel.
Die navorsers het bevind selfs ‘n jaar na die dieet begin is, was ses hormone steeds uiters aktief besig om die vrywilligers se honger aan te vuur.
“Dit is glad nie verrassend nie,” het Proietto gesê. “Dit is waarskynlik ‘n permanente reaksie in die liggaam.”
Die navorsing is in die New England Journal of Medicine gepubliseer.
– Volg Nuus24 op Twitter.
- AP