Dié stoute webtuiste is veilig by die werk
2010-07-21 03:39
Kaapstad – Playboy Enterprises het ‘n webtuiste geloods wat glo veilig is om by die werk te gebruik sodat mans nie hulself oor hul rekenaarskerms hoef te gooi wanneer die baas verby loop nie.
TheSmokingJacket.com sal geen naaktheid bevat wat Playboy.com ongeskik vir ure by die kantoor maak nie.
Dié nuwe webtuiste sal eerder op humor fokus om Playboy se teikenmark (mans tussen die ouderdom van 25 en 34) te bereik wanneer hulle tyd by die werk voor die rekenaar deurbring.
‘n Groot deel van hul gehoor gebruik Playboy.com ná werksure, meen Jimmy Jellinek, Playboy se redaksionele direkteur.
“Ons het gesien ons mis ‘n goeie geleentheid om ouens te bereik wanneer hulle die meeste op die internet is – wanneer hulle by hul lessenaar sit, nie werk nie en e-posse aan hul vriende stuur.”
TheSmokingJacket.com sal nie die lang onderhoude of in-diepte artikels bevat wat in Palyboy is nie.
Die hele punt is om nie ernstig te wees nie. Besoekers kan byvoorbeeld ‘n lys sien wat die tekens uitwys van wanneer ‘n man opgegee het om ‘n vrou se aandag te kry.
Daar sal skakels wees na die soort dinge wat mense reeds vir hul vriende e-pos.
Dit is vir mense wat verveeld is by die werk, vertel Matt Gibbs, die hoof-vervaardiger van die webtuiste.
Volgens Theresa Hennessey, Playboy-woordvoerder, kry Playboy.com sowat 6 miljoen unieke besoekers per maand.
Jellinek sê hy sal bly wees as TheSmokingJacket.com 1 miljoen unieke besoekers per maand ontvang.
Volg Nuus24 op Twitter.
- Sapa - AP