Die maan eintlik nat agter die ore
2011-08-18 17:53
New York – Die maan is 4,36 miljard jaar oud, sowat 200 miljoen jaar jonger as wat voorheen geskat is, volgens nuwe bevindinge.
Die nuwe skatting is gemaak ná ‘n ondersoek en datering van onlangs ontdekte maanrotse.
“Die jong ouderdom van die maanrots beteken die maan het heelwat later as ons vroeër gedink het verhard,” het die navorser Richard Carlson van die Carnegie-instituut in Washington gesê.
Die navorsing is in die joernaal Nature gepubliseer.
‘n Algemene teorie oor die ontstaan van die maan lui ‘n planeet so groot soos die aarde het ons tuisplaneet in sy vroeë ontwikkelingstyd getref.
Die magma wat uit die reuse-botsing uitgespat het, het geleidelik afgekoel en verhard in die ruimte om die aarde se satelliet te vorm.
“Ons sal dalk ons kennis oor die ontstaan van die maan moet heroorweeg,” het Carlson gesê.
– Volg Nuus24 op Twitter.
- AFP