Dié groep pleeg meeste selfmoord
2012-09-20 14:15
Londen – Middeljarige mans van 'n minderbevoorregte agtergrond is tien keer meer geneig om selfmoord te pleeg as mense uit ander groepe, dikwels omdat hulle hul sin van identiteit en trots verloor het, het navorsers Donderdag gesê.
'n Navorsingsprojek wat van stapel gestuur is deur die Britse liefdadigheidsorganisasie The Samaritans, bied verduidelikings vir 'n tendens wat daarop dui dat mans in hulle 30's, 40's en 50's veel meer geneig is om selfmoord te pleeg.
"Terwyl selfmoord 'n gevolg van jou geestestoestand is.... is dit ook 'n maatskaplike kwessie en 'n kwessie van gesondheids-ongelykheid. Dit is onregverdig en onredelik," het Stephen Platt, 'n professor by die Universiteit van Edinburgh wat die navorsingsverslag in Londen voorgelê het, gesê.
"Die verskille wat ons in hierdie verslag beklemtoon.. is nie die soort verskille waarmee 'n beskaafde samelewing gemaklik kan wees nie."
Hoewel die studie veral op Brittanje fokus, meen navorsers die bevindings is van toepassing op enige land met 'n dienste-gedrewe ekonomie.
Mans in hulle middeljare is volgens die studie in 'n "bufferperiode" waartydens hulle nie seker is of hulle moet optree soos hulle ouer, meer tradisionele, stil pa's, of hulle jonger, meer progressiewe, individualistiese seuns nie.
"Die veranderende aard van die arbeidsmark oor die laaste 60 jaar het werkersklasmans beïnvloed," het die verslag gelui. "Met die agteruitgang van bedrywe waar mans tradisioneel in beheer is, het die mans nie net hulle werke verloor nie, maar ook die bron van hulle manlike trots en identiteit."
Die Wêreldgesondheidsorganisasie beraam dat bykans 'n miljoen mense elke jaar selfmoord pleeg.
Mans is volgens die studie in bykans elke land in die wêreld meer geneig om selfmoord te pleeg.
In Brittanje spesifiek pleeg daar elke jaar 3 000 mans uit 'n minderbevoorregte agtergrond selfmoord.
Platt het die bevindings as "skokkend" beskryf en gesê mans as risikogroep kan nie meer geïgnoreer word nie.
– Volg Nuus24 op Twitter.
- Reuters
