Dié gas 'soos steroïed' vir weer
2011-11-21 07:03
Johannesburg – Maak gereed vir gevaarliker, onvoorspelbare, uiterste weersomstandighede weens klimaatsverandering.
Só het meer as 200 natuurwetenskaplikes, sosioloë en ekonome die politieke leiers gewaarsku wat aanstaande week in Durban vir COP17 byeenkom.
Die wetenskaplikes, almal lede van die Verenigde Nasies se interregeringspaneel oor klimaatsverandering, het in ’n verslag, “Managing the Risks of Extreme Events and Disasters to Advance Climate Change Adaptation”, gesê regeringsleiers moet op die klimaatberaad ooreenkomste oor die vermindering van kweekhuisgasse vind.
Geïntegreerde planne om mense by klimaatsverandering en veranderende weerpatrone te laat aanpas, sal lewens en geld spaar, lui die verslag.
Dié kundiges is bekommerd dat buitengewone weersomstandighede mense kan oorweldig en sommige plekke op aarde onleefbaar kan maak.
In die verslag word op uiterste klimaatsomstandighede, hittegolwe, vloede, droogtes en storms gefokus. Die samestellers het byvoorbeeld gesê aanhoudende baie warm dae gaan in die nabye toekoms die reël eerder as die uitsondering wees. Koue dae gaan in intensiteit toeneem, maar nie so langdurig wees nie.
“Ons moet bekommerd wees,” het een van die leier-outeurs, Maarten van Aalste, direkteur van die Internasionale Rooi Kruis, gesê. “Ons sal rampe moet kan voorspel en risiko’s verminder eerder as om te wag totdat hulle gebeur en ná die tyd op te ruim.”
Dr. Gerald Meehl, senior wetenskaplike van die Nasionale Sentrum vir Atmosferiese Navorsing in Boulder, Amerika, het nadat die verslag bekendgemaak is aan NBC Nightly News gesê dit is asof die weer op steroïed is.
“Net soos wat steroïed ’n basketbalspeler sterker maak, so is kweekhuisgasse steroïed vir die klimaatstelsel. Hulle verbeter die kanse op hittegolwe wat rekords oortref.”
Die ekonome sê lande se ekonomiese koste sal weens klimaatsverandering styg.
– Volg Nuus24 op Twitter
- Beeld