Dié formulemelk keer toe nié allergieë
2011-07-07 08:32
New York – ’n Soort formulemelk vir babas wat bemark word as “allergie-vriendelik”, keer glo nie dat babas met ’n familiegeskiedenis van allergieë ook allergiese reaksies toon nie.
Australiese navorsers het Nestlé se NAN Hypoallergenic, wat onder meer wei bevat, in ’n studie getoets. Hulle skryf in die Journal of Allergy and Clinical Epidemiology dat hulle 620 hoë-risiko-babas, wat byvoorbeeld ’n familiegeskiedenis van allergieë het, in drie groepe verdeel het.
Ná borsvoeding is die babas onderskeidelik wei-, koeimelk- of sojaformule gegee om te drink. Die babas was vir gemiddeld drie tot vier maande op borsmelk voordat die studie begin het en is twee jaar lank opgevolg.
Hulle het gereeld velpriktoetse ondergaan om te kyk of hulle allergiese reaksies toon teen melk, eiers, grondboontjies, stofmyte, gras en kathare. Simptome soos ekseem en reaksies op kos is ook aangeteken.
Net meer as die helfte van die babas het allergieë ontwikkel, ongeag die soort formule wat hulle gekry het.
Vorige studies het wel getoon die wei-formule en soortgelyke produkte kan babas teen allergieë beskerm indien die kinders dit vroeg genoeg kry en die babas nie uitsluitlik geborsvoed word nie. Dit het daartoe gelei dat sommige oorsese pediaters die gebruik van dié formules aangemoedig het.
Dokters het in reaksie gesê verdere navorsing is nou nodig.
Volg Nuus24 op Twitter.
- Reuters