Dié diamante kos jou plaas se prys

2012-09-20 12:02

Josephine Johnson, sakebestuurder vir die mynmaatskappy Rio Tinto, hou 'n pienk diamant van 1,32 karaat omhoog. Dié diamant sal na verwagting vir meer as $1 miljoen (sowat R 8,34 miljoen) per karaat verkoop word. (Aaron Tam, AFP)

Hongkong – 'n Reus in die internasionale mynwese stal op die oomblik 'n versameling uiters seldsame gekleurde diamante in Hongkong uit in 'n poging om die deure na die Chinese juweliersmark te open.

Die 75 pienk, rooi en blou diamante word deur die mynmaatskappy Rio Tinto tentoongestel by 'n private uitstalling.

Dié maatskappy was in Februarie in die nuus ná 'n enorme pienk diamant van 12,76 karaat by een van sy Australiese myne gevind is. Dit is die grootste pienk diamant wat ooit in dié land gevind is.

Minder as 0,03 persent van die wêreld se diamante is pienk, en dié waardevolle steentjies kan vir tot 50 keer die prys van 'n gewone diamant verkoop word.

"In die laaste vyf jaar het ons werklik baie groei in China en Indië gesien," het Josephine Johnson, 'n sakebestuurder vir Rio, Donderdag gesê.

"Ons weet China word vir ons al hoe belangriker as 'n mark. China sal die mark in die VSA eintlik teen die jaar 2025 verbysteek in terme van die aankoop van diamante," het sy bygevoeg.

– Volg Nuus24 op Twitter.

- AFP