Derduisende visse vrek
2011-12-14 09:30
George. – Die gewilde hengel-strand by Blombos, tussen Stilbaai en Witsand in die Suid-Kaap, was die naweek besaai met nagenoeg 2 000 dooie visse wat uitgespoel het.
Hul vrekte hou verband met ’n skielike verandering in watertemperatuur, het dr. Stephen Lamberth, ’n navorser van die Wes-Kaapse departement van landbou, bosbou en visserye, gister gesê.
“Wanneer ’n sterk suidwester of suidooster waai, word warm bo-water teruggestoot en vervang deur koue water van onder af. Rifvisse, soos dié wat by Blombos gevrek het, is baie sensitief vir ’n vinnige daling in temperatuur wat met sulke opwellings in die water gepaard gaan.”
Dié visse, wat van warmer water hou, het glo weens termiese skok gevrek.
Hulle kan nie vinnig genoeg op die koue water reageer nie.
“Dié wat nie weens skok gevrek het nie, het waarskynlik na die strand geswem waar die water warmer is en toe uitgespoel.”
Dit is blykbaar ’n normale verskynsel aan die Suid-Kaapse kus en kom van tyd tot tyd in die Tsitsikamma- en Knysna-omgewing voor.
– Volg Nuus24 op Twitter
- Die Burger