‘Darwin sou pleit dat verwoesting stop’
2009-11-16 08:18
Elsabe Brits
Alexandrië (Egipte) – As Charles Darwin vandag hier was, sou hy by die mensdom gepleit het om op te hou om die biodiversiteit en rykheid van die natuurlewe te verwoes.
Dit was die boodskap van dr. Randal Keynes, Darwin se agter-agter-kleinseun, gister op die internasionale Darwin’s Living Legacy-konferensie wat hier deur die Britse hoëkommissariaat aangebied word.
Kenners oor evolusie en Darwin se rol in die gemeenskap in die breë neem aan die konferensie by die Bibliotheca Alexandrina deel.
Keynes het gesê sedert Darwin 150 jaar gelede The Origin of Species gepubliseer het, het ons die wêreld verarm en die hele planeet in gevaar gestel, op so ’n groot skaal dat ons die biodiversiteit van lewe in gevaar stel.
Darwin sou vandag gesê het stop die feesvieringe en begin om mense in te lig oor hierdie skat wat ons besig is om te verloor, soos beskryf in sy boeke.
In ’n sessie oor hoe die mens ontwikkel het en waarheen ons op pad is, het prof. Eugenia Cunha van die Coimbria-universiteit gesê Darwin kon sê die mens is afkomstig van Afrika sonder dat hy toegang gehad het tot hominied-fossiele of genetika.
“Dit is byna wonderbaarlik.”
Evolusie het nie plaasgevind danksy die mens nie, ons eie evolusie is baie onlangs.
Dit was daar nog lank voordat mense of ons voorsate hier was.
Prof. Francis Thackeray van die Universiteit van die Witwatersrand het verwys na die groot paleo-antropologiese vonds waaroor Beeld onlangs berig het maar waarvan die detail nog nie bekend gemaak kan word nie omdat die nog nie deur portuur-evaluasieproses is nie.
Volgens Thackeray sal besonderhede oor die vonds oor sowat twee maande bekend gemaak word.
Dit sal in die vakjoernaal Science verskyn en sal lei tot die totstandkoming van ‘n nuwe filogentiese stamboom.
Dit beteken dat handboeke oor menslike evolusie en hominied-voorsate verander sal moet word.
- Die Beeld