Dapper krieke sal sterf vir die liefde
2011-10-07 18:06
New York – Mans dapper genoeg om hul lewens vir hul bemindes af te staan kan ook in krieke waargeneem word, het navorsers bevind.
Die navorsers het bevind krieke is nie net romanties van aard as dit by hul musikale gekriek kom nie, maar ook in hul toegewydheid aan die leifde.
“Baie mense dink sulke dapper gedrag vind slegs by mense of ander soogdiere plaas,” het die navorser Rolando Rodríguez-Muñoz gesê. “Asof dit met intelligensie of opvoeding verband hou.”
“Ons het bevind selfs klein manlike insekte, wat mens nie gewoonlik as slim of liefdevol sal beskryf nie, kan dapper en beskermend oor hul maats wees,” het Rodríguez-Muñoz, van die Universiteit van Exeter in Brittanje, gesê.
Die navorsers het 200 000 ure se beeldmateriaal van krieke bestudeer en bevind by paartjies vergroot die wyfie se kanse op oorlewing as die twee aangeval word terwyl die mannetjie s’n verklein.
“Krieke se verhoudings is baie anders as wat ons verwag het,” het Rodríguez-Muñoz gesê. “Hulle boelie glad nie hul maats nie.”
“Inteendeel, mannetjies is baie dapper en beskerm die wyfies.”
Die navorsing is in die joernaal Current Biology gepubliseer.
– Lees meer hier.
– Volg Nuus24 op Twitter.