Curiosity bestudeer klippe van naderby

2012-09-26 13:53

Washington – Nasa se Curiosity-verkenningstuig het sy eerste noue-kontak eksperimente voltooi.

Die robot het sy arm-instrumente teen ‘n piramidale klip gedruk om die atomiese elemente van die klip vas te stel, het BBC News berig.

Daar was verwag dat die klip, wat na die ontslape Curiosity-ingenieur Jake Matijevic vernoem is, nie baie navorsingswaarde sou hê nie. Dit is meer as ‘n vroeë kans gesien vir die Curiosity om sy instrumente te gebruik.

Die Curiosity het nou weer sy reistog hervat.

Maandag het die Curiosity sowat 42 m gereis, die langste reistog wat die robot nóg aangepak het sedert dit sewe weke gelede op Mars geland het.

Die robot is op pad na ‘n gebied waar daar glo drie tipes geologiese terrein is. Wetenskaplikes het die gebied Glenelg gedoop.

Curiosity sal by Glenelg vir die eerste keer sy boor gebruik.

Die verkenningstuig sal minstens twee jaar lank op die planeet aktief wees en sal inligting van Mars se geologie en geomorfologie, asook die aard van organiese aktiwiteit op die planeet se oppervlak, na die aarde terugsein.

Lees hier meer.

– Volg Nuus24 op Twitter