Churchill bang VVV voorval veroorsaak "massa paniek"
2010-08-07 03:32
Londen – Winston Churchill het blykbaar ‘n berig oor ‘n VVV-voorval stil gehou omdat hy bang was dit veroorsaak "massa paniek".
Die kleinseun van ‘n offisier in die Royal Air Force (RAF) het in 1999 ‘n brief aan die departement van verdediging oor die voorval geskryf.
Die offisier was ook blykbaar een van Churchill se persoonlike lyfwagte.
Sy brief en Churchill se beweerde reaksie het Donderdag die lig gesien.
Die Verenigde Koninkryk se nasionale argiewe het meer as 5 000 bladsye van korrespondensie, sketse en verslae van Vreemde Vlieënde Voorwerpe-voorvalle Donderdag bekendgestel.
Blykbaar het die man se oupa gehoor hoe Churchill en Eisenhower ‘n sekere voorval bespreek.
Daar is aan Churchill berig dat ‘n vliegtuig oppad terug van ‘n verkenningsvlug ‘n VVV gesien het.
Die VVV het blykbaar geluideloos langs die vliegtuig in die lug gehang en die bemanning het selfs foto’s van die Vreemde Vleende Voorwerp geneem.
Volgens die korrespondensie, wat Donderdag bekendgemaak is, het Churchill onmiddellik beveel dat dit as hoogs geklassifiseerde informasie beskou moet word.
Hy het blykbaar aangevoer dat die uitlating van die voorval “tot massa paniek" kan lei en mense "hul geloof in die Kerk kan kos”.
Volg Nuus24 op Twitter