COP17 'n groot sukses, sê Zuma
2011-12-11 19:50
Johannesburg – Pres. Jacob Zuma het Suid-Afrika Sondag geluk gewens met die sukses van die COP17-beraad in Durban.
"Die uitkoms in Durban is 'n oorwinning vir Afrika. Probleme wat so lank geneem het om op te los is opgelos op ons grondgebied," het Zuma in 'n verklaring gesê.
"Ons is baie bly en trots op die Suid-Afrikaanse span wat so hard gewerk het saam met die Verenigde Nasies se raamwerkkonvensie oor klimaatsverandering (UNFCCC)," het hy gesê.
Besluite is by die COP17-beraad geneem om geld opsy te sit vir die begin van 'n Groen Klimaatfonds, wat ontwikkelende lande sal help in hulle pogings om in die toekoms skoon energie op te wek.
Daar is ook op die beraad besluit op 'n padkaart na 'n wêreldwye klimaatooreenkoms wat, vir die eerste keer, alle groot vrystellers van kweekhuisgasse sal insluit.
– Volg Nuus24 op Twitter.
- SAPA