Burgemeesters teken verklaring oor klimaat
2011-12-06 08:30
Durban – Die Durban-verklaring, waarin plaaslike owerhede die verantwoordelikheid neem om stede en dorpe se inwoners te help om by klimaatsverandering aan te pas, is gister hier by COP17 onderteken.
Altesame 114 burgemeesters het die Durban-verklaring onderteken. Die burgemeesters is verteenwoordigers van 900 plaaslike owerhede in 28 lande.
Dié verklaring hou ook verband met plaaslike owerhede se erkenning van die bedreigings en uitdagings van klimaatsverandering en dat dit húl plig is om mense daarby te laat aanpas.
Die burgemeesters het gister in ‘n gesamentlike verklaring gesê hulle besef die uitdaging wat klimaatsverandering aan hulle stel, is besonder groot.
Hulle erken dat plaaslike owerhede die verantwoordelikheid het om toe te sien dat volhoubare ontwikkeling plaasvind. Hulle wéét dis hulle wat hul inwoners sal moet help om aan te pas.
Hulle stem eenparig saam dat “aanpassing” by klimaatsverandering aan die kern is van die mens se voortbestaan.
Hulle erken onder meer die regte van moeder aarde en dat die mens se voortbestaan in die weegskaal is weens die feit dat voorheen aangeneem is groei kan “oneindig” plaasvind.
Hulle erken ook dat die “ryk” noorde in die “skuld” is by die “arm” suide.
– Volg Nuus24 op Twitter.
- Die Burger