Buffels bly gevaarlike diere, sê kenner
2012-01-19 07:01
Bloemfontein – Dr. Willie Cronjé wat Dinsdag op sy wildplaas by Boshof in ’n buffelaanval gesterf het, is slegs een van twee mense wat die afgelope dekade buite die veld deur ’n buffel aangeval is.
Reuben Saayman, ondervoorsitter van die nasionale vereniging vir buffeleienaars, sê slegs twee buffelaanvalle op mense wat nie in die veld was nie, is die afgelope tien jaar aangemeld.
“Dit is ’n pluimpie vir Suid-Afrikaanse buffelboere en hul professionele hantering van dié diere.
“Dit is baie sleg as lewens in die proses geneem word en ons harte gaan uit na dr. Willie Cronjé se familie en vriende.”
’n Vriend van Cronjé, André de Kock, sê die buffel wat Cronjé sy lewe gekos het, is in die boma wakker gemaak nadat hy verdoof is.
“Almal het uit die boma beweeg voordat die dier wakker was. Die buffel het in die boma se drukgang na ’n hok beweeg. Cronjé het probeer om die hok se hek van buite die boma toe te maak, toe dit vasgehaak het.
Hy het toe in die boma ingeklim aan die buitekant van die hok waarin die buffel was om die hek te probeer toemaak.”
De Kock sê die buffel het Cronjé gewaar en weer by die hek uitgestorm. Dit het Cronjé met een horing geskep.”
Saayman sê buffels is gevaarlike wilde diere. Bulle se aanvalspatrone verskil gewoonlik van dier tot dier. “Koeie met kalfies is baie gevaarlik, terwyl bulle eers kwaad moet word voordat hulle aanval.”
’n Baie aggressiewe buffelbul kan ’n mens skep en deur die lug gooi, trap en gaffel en daarmee aanhou, terwyl ’n ander bul op ’n mens kan afstorm, omgooi en dan verder hardloop sonder om om te draai. ’n Ander aanvalsvoorbeeld is dié van ’n bul wat ’n persoon met een horing kan deurboor en dan weghardloop.
– Volg Nuus24 op Twitter
- Volksblad