Bruce Willis sleep Apple hof toe

2012-09-03 18:42

Los Angeles – Die aksie-ster Bruce Willis is in ‘n geveg betrokke om sy musiekversameling te red.

Die akteur gaan Apple hof toe sleep sodat hy die liedjies wat op sy iPod afgelaai is, eendag vir sy dogters kan nalaat as hy dood is, het Sky News berig.

Willis het glo al duisende dollars op sy musiekversameling spandeer.

Onder Apple se huidige bepalings en voorwaardes kan Willis nie sy musiek vir Rumer, Scout en Tallulah agterlaat nie, omdat die musiek tegnies net ‘geleen’ is en nie besit word nie.

Dit beteken dat sy versameling basies niks werd sal wees as hy doodgaan nie.

Die 57-jarige akteur het glo sy prokureurs gevra om ondersoek in te stel of die musiek onder die eienaarskap van ‘n familietrust geplaas kan word.

‘n Wen teen die tegnologiereus Apple kan miljoene mense bevoordeel wat liedjies van iTunes afgelaai het.

Baie mense kom nie agter dat hulle liedjies onder ‘n lisensie-ooreenkoms aflaai nie. Dit beteken dat die liedjies nie aan ander mense bemaak kan word nie.

En as Apple vermoed dat die reëls verbreek word, kan hulle die gebruikers se rekeninge opskort.

– Volg Nuus24 op Twitter