Brakkie leef ná ’n week in gat
2011-11-15 09:28
Johannesburg – Hy het net drie bene en ’n kort stompie vir ’n stert, maar dié hondjie het nog lank nie gaan lê nie.
Tendai, wie se naam “dankbaar vir God” beteken, is een van die ergste gevalle wat die dierewelsynsorganisasie Wetnose in Bronkhorstspruit in ’n lang tyd gesien het. So sê Debbie Herselman, hoofbestuurder van Wetnose.
Dié ses maande oue basterbrakkie is sowat ’n week gelede deur ’n jong man daar aangebring.
“Hy was oortrek van die maaiers. Die wurms het hom byna lewend opgeëet,” het Herselman gesê.
Volgens haar is Tendai in ’n gat op ’n plaas naby Refilwe, buite Cullinan, gevind.
“Werkers op die plaas het die man (van die plaas) glo in kennis gestel.
“Die man het die hondjie eers huis toe geneem waar hy hom gewas het om van wurms ontslae te probeer raak.
“Toe hy besef die hondjie se beserings is baie erger as wat hy eers gedink het, het hy hom hierheen gebring.”
Tendai se linkeragterbeen moes verlede week tot onder sy knie geamputeer word en sy stert is nou ’n stompie.
“Ons weet nie hoe hy in die gat beland het nie. Ons vermoed hy was dalk eers deur ’n motor raak gery en het toe op ’n onverklaarbare wyse in die gat beland.”
Herselman het gesê Tendai was minstens ’n week lank in die gat.
“Hy was baie ontwater en uitgehonger,” het Herselman gesê.
Die organisasie se hokke is oorlopens toe vol met sowat 290 honde, 60 katte, vyf donkies, skape en ander pluimvee.
Die behoefte aan honde- en katkos is ook groot.
– Volg Nuus24 op Twitter.
- Beeld