Borskanker by mans skaars, maar dodelik
2011-10-19 10:15
New York – Borskanker by mans is uiters skaars, maar wanneer dit wel gediagnoseer word is die kans dat dit terminaal kan wees, groter as by vroue.
Navorsers van die Nasionale Universiteit van Singapoer het bevind al word borskanker minder as 1% so gereeld by mans as by vroue gediagnoseer, het hulle ‘n groter kans om as gevolg daarvan te sterf.
“Mans wat ‘n knop op hul bors voel stel dikwels behandeling langer uit as ‘n vrou met dieselfde simptome,” het die navorser Mikael Hartman van die universiteit gesê.
Borskanker by mans word in die meeste gevalle eers in hul 60’s en 70’s gediagnoseer, het die Amerikaanse Nasionale Kankerinstituut bevind.
Hartman en sy kollegas het bevind as borskanker by mans so vroeg gediagnoseer word as wat dit in die meeste gevalle by vroue gediagnoseer word, het hulle ‘n groter kans om te oorleef.
“Borskanker by mans is uiters skaars en mans moet bewus wees dat hulle behandeling moet soek as hulle ‘n knop op hul bors voel,” het Hartman gesê.
Die navorsing is in die Journal of Oncology gepubliseer.
– Volg Nuus24 op Twitter.
- Reuters