Bome waai omdat water se gehalte ly
2010-09-06 06:35
Frankfort. – 70 000 bome, waarvan 99% wilgerbome is, gaan binne die volgende vyf tot sewe jaar langs die Wilgerivier buite Frankfort uitgeroei word omdat dit die gehalte van 57 000 Vrystaters en ongeveer 12 miljoen Gautengers se drinkwater nadelig raak.
Peter Hawley, die man agter die uitroeiprojek van die nie-regeringsorganisasie The River Trust, sê boomstompe beland in die water en veroorsaak verstoppings stroom-af.
“Die stukke boom lê en verrot. Dit pak op die rivierbodem saam en raak vislewe en watergehalte.”
Die water kan weens die versperrings gevolglik nie na die Mafube-munisipaliteit (groter Frankfort-omgewing) se watersuiweringsaanleg vloei nie en stagneer.
Dit veroorsaak dat die water onder die aanvaarbare gesondheidspeil val.
12 miljoen mense in Gauteng is afhanklik van water van die Katsedam in die Lesotho-hooglande.
Dié water beland via die Wilgerivier in die Vaalrivier.
Die Suid-Afrikaanse Brouerye (SAB) werk saam met The River Trust om die Wilgerivier skoon te maak.
Die projek Let The River Flow se mikpunt is om die 315 km lange Wilgerivier skoon te maak.
Hawley, wat dié projek in 2009 gestig het, sê benewens die uitroei van die wilgerbome langs die rivier word die plantasies populierbosse ook uitgehaal.
“Dié bome suig ongelooflike hoeveelheid water. Die populierbos dien geen doel nie.”
Hy sê die oorgrote meerderheid wilgerbome is hol binne en beland daarom maklik in die rivier.
“As die projek eendag klaar is, sal dié probleem op lang termyn opgelos wees.”
Volgens Hawley het die nasionale regering toestemming gegee om dié bome te verwyder.
Hawley sê die departement van landbou, bosbou en visserye het ander bome gegee om langs die rivier te plant.
“Dit is glo wetenskaplik bewys dat dié bome, die vaderlandswilger en kareeboom, die regte boom is om langs die rivier te plant.”
100 bome is Vrydag geplant.
André Fourie, hoof van die SAB se afdeling vir volhoubare ontwikkeling, sê R1 miljoen is vir dié skoonmaakproses bewillig.
Robyn Chalmers, SAB-woordvoerder, het gesê die waterverskaffing uit die Wilgerivier het langtermyngevolge vir die Suid-Afrikaanse ekonomie.
“Die SAB erken die skaarste van water in Suid-Afrika, asook die uitwerking daarvan nie net op die onderneming as brouery nie, maar ook aan die gemeenskappe wat hy bedien.”
Tot op hede is 10 km van die rivier reeds skoongemaak.
Volg Beeld op Twitter
- Beeld