Bok-haker Facebook-slagoffer
2010-01-15 08:52
Hendrik Cronjé
Die Springbok-haker van die Vrystaat-Cheetahs Adriaan Strauss moes vandeesweek tot sy skok deur ’n vriend ingelig word dat hy reeds die afgelope ongeveer vier maande ’n vals profiel op Facebook het.
Dié profiel het Strauss in ’n yslike verleentheid gedompel en regstappe word nou teen die skuldige oorweeg. Die vals profiel kon onder meer die verkeerde indruk wek dat die Bok-haker “rondfoeter”.
Strauss se regsverteenwoordiger, Stephan Weyers, het bevestig dat die Bok-haker woedend is en dat dit ’n vrou is wat glo die vals profiel geskep het.
“Ons weet wie die skuldige is en is in besit van selfoonnommers,” sê Weyers.
“Regstappe sal nou afhang van die samewerking wat ons kry.”
Weyers sê Strauss het nog nooit sy eie profiel op Facebook geskep nie en stel ook nie werklik daarin belang nie. “Daarom was hy juis so verbaas toe ’n vriend hom oor sy profiel uitgevra het.”
Die presiese skade wat dié rugbyspeler se beeld deur die vals profiel berokken is, moet nog volgens Weyers bepaal word. “Ons wil nou onder meer vasstel watter boodskappe valslik namens Strauss uitgestuur is.”
Weyers sê dit is onseker waarom die skuldige besluit het om so ’n profiel te skep.
Weyers sê Strauss is veral bekommerd oor wat aanhangers dink wat oortuig was dis hy wat hul vriendskap aanvaar en met hulle in die kuberruimte gekommunikeer het.
- Volksblad