Boer verloor 850 visse weens besoedelde water
2010-08-19 09:54
Oos-Kaap - 'n Boer in die Oos-Kaap sê hy is verpletter ná sowat 850 visse in besoedelde water in sy private dam gevrek het, het Dispatch Online Donderdag berig.
"Ek is baie omgekrap. Mense besef nie wat hulle aan die omgewing doen nie," het Garth Oberem van Amalinda gesê.
"Sowat 850 visse moes gevrek het. Ek het tilapia, karp, baars en koi-spesies. Net die tilapia het gevrek."
Samkelo Ngwenya, woordvoerder van die Buffalostad-munisipaliteit, het gesê die water se chloorvlakke was te hoog.
"Die span wat uitgestuur is en toetse gaan doen het, het bevind dat daar geen tekens van riool was nie. Hulle het watermonsters geneem en bevind dat die visse weens hoë chloorvlakke gevrek het," het hy gesê.
"Ons vermoed dat water uit iemand se swembad teruggespoel en die water deur 'n stormwaterdrein in die gebied in die dam gevloei het, maar ons ondersoek die saak."
Volg Nuus24 op
Twitter
- SAPA