Bobbejaanma probeer vergeefs red
2011-10-18 08:06
Nelspruit – In ’n klaarblyklik desperate poging om haar dooie kleintjie aan die lewe te kry het ’n wyfiebobbejaan lug in die kleintjie se bek geblaas.
Leon Venter van Letsitele in Limpopo het dié uitsonderlike gebaar van moederliefde onlangs in die Krugerwildtuin beleef.
“Ek het al gehoor bobbejane dra hul dooie kleintjies saam met hulle, maar kon nie my oë glo nie toe ek dit onlangs self aanskou het.”
Hy kon darem ’n foto daarvan neem voordat die wyfie met haar kleintjie se karkas in die digte bos verdwyn het.
“Die wyfie het by tye die slap kleintjie se bekkie oopgemaak en daarin gekrap.
“Ander kere het sy hom aanhoudend geskud so al asof sy vir hom wil sê: ‘Word wakker!’” het Venter vertel.
Hy en sy gesin was twee weke gelede op pad na Onder-Sabie waar hulle gaan kampeer het.
Hy is vroegoggend by Orpenhek in en het met die H7-pad in die rigting van Satara gery.
Tussen die bekende baken Bobbejaankrans en die Nsemani-dam het hy op ’n trop bobbejane afgekom wat in die pad gesit het.
“Ons het stilgehou om na die spelery van die klomp kleintjies te kyk toe ek uit die hoek van my oog die wyfie in die trop sien. Ek het besef die kleintjie in haar arms is dood.
“Dit was egter hartroerend om te sien hoe sy bly probeer het om die kleintjie aan die lewe te kry.”
Hulle kon net enkele minute lank na die hartseertoneel kyk voordat die trop bobbejane vir ’n aankomende motor geskrik en die veld ingestap het.
“Dit was die laaste sien van die ma en haar kleintjie.”
– Volg Nuus24 op Twitter.
- Volksblad