Blyery met slange kos man dalk toon
2009-09-23 07:08
Virginia Keppler
Johannesburg - Altesame 37 dae in ’n hok met 40 dodelike slange kan ’n man moontlik sy een “wysvingertoon” kos.
Natie Swart, beter bekend as Nutty Natie, het besluit om saam met die giftige slange te bly om geld in te samel vir drie liefdadigheidsorganisasies – Save a Child, House of Horizon en die Unesibindzi Tortoise Sanctuary.
Swart het 37 dae sonder enige voorval met pofadders, swart en groen mambas, boomslange en kobras deurgebring voordat ’n pofadder hom op sy regtervoet se “wysvingertoon” gepik het.
Hy word in die Kalafong-hospitaal wes van Pretoria behandel.
Hennie Jonk, die eienaar van die Chameleon Village-reptielpark by die Hartbeespoortdam, waar Swart saam met die slange gebly het, het gesê Swart wou ’n slang van ’n kas in die hok afhelp toe hy per ongeluk op die pofadder getrap en dié hom gepik het.
Swart se been is tot vier keer groter as die normale geswel. “’n Dokter gaan in die teater kyk of die slang se tand sy toon se been deurboor het. As dit die geval is, moet sy toon moontlik afgesit word omdat dit gangreen kan veroorsaak,” het Jonk gesê.
Volgens hom wou Swart aanvanklik nie die hok verlaat nie.
“Hy wou bitter graag genoeg geld vir die drie liefdadigheidsorganisasies insamel deur Martin Smit, ’n Suid-Afrikaner, se rekord van 113 dae te verbeter. Hy wou 121 dae in die slanghok deurbring.”
Swart het egter by monde van Jonk laat weet dat sodra hy uit die hospitaal ontslaan is, gaan hy terug in die hok klim en van voor af probeer.
“Hy wil nie die organisasies teleurstel nie.”
- Beeld