Bly uit die water, waarsku Sanparke
2011-09-12 07:03
George - Die vlak van skadelike bakterieë in die Knysna-strandmeer is tans so hoog, dat Sanparke mense gewaarsku het om nie in die water te swem of ander watersport daar te beoefen nie.
Eers het rioolslyk onlangs uit een van die houdamme by die Knysna-afvalwateraanleg in die strandmeer beland, het Lauren Waring, waarnemende munisipale bestuurder van die Oesterdorp, gesê.
“Verlede maand het halfbehandelde afvalwater ook deur filters by die aanleg gesypel.
“As gevolg hiervan het die vlakke van die nuttige bakterieë, wat gebruik word om afvalwater by die aanleg af te breek, ook afgeneem.”
Die Burger is onlangs deur talle ontstelde inwoners gebel wat gesien het hoe menslike ontlasting in die water naby die Knysna-koppe dryf.
Volgens die inbellers het ’n “vroteierreuk” in die lug bo die strandmeer gehang.
André Riley van Sanparke, onder wie se beheer die strandmeer val, het bevestig kennisgewingborde is aangebring om die publiek te waarsku dat die vlakke van skadelike bakterieë in sekere dele van die strandmeer die aanvaarbare vlak vir ontspanningsaktiwiteite oorskry.
“Ons is veral bekommerd oor die Ashmead-kanaal.”
Toetse wat reeds gedoen is, het getoon vlakke van bakterieë in die water by die Knysna-seiljagklub is normaal, maar hoog in die Ashmead-kanaal en Theseneiland-ingang.
Inwoners is gewaarsku dat hulle die water op eie risiko binnegaan.
Volgens Waring is die vloei van water van die afvalwateraanleg na die strandmeer reeds Donderdag om 13:30 vir altesaam 36 uur lank gestaak.
“’n Stelsel, wat die vuil houdam uitskakel, is in gebruik geneem om die water 36 uur lank te hersirkuleer.”
Volgens haar is ’n proses, waarin slyk in die bio-reaktor terugvloei om die vlakke van daardie bakterieë wat die afvalwater moet afbreek, te verhoog, intussen ook by die oksidasie-damme begin.
Twee tenkwaens met gespesialiseerde toerusting is gebruik om die besoedelde gebied skoon te suig
“Die houdam waar die probleem ontstaan het, word ook skoongemaak en geen vastestowwe behoort deur te glip nie.”
Volgens die burgemeester, Georlene Wolmarans, word al die moontlike gedoen om die probleem op te los.
– Volg Nuus24 op Twitter
- Die Burger