Blog oor 100 soene nou websensasie
2009-09-14 17:30
Taipei – 'n Vrou van Taiwan se begeerte om 100 mans in Parys te soen het oornag in 'n websensasie verander nadat sy al die inligting omtrent haar soentog op haar, nou gewilde blog gesit het.
Yang Ya-ching (27) ‘n student wat haar meestersgraad in musiek doen, het al meer as 54 soene ontvang.
Sy het baie aandag getrek nadat sy oor haar ervaring begin blog het en selfs foto’s van sommige van dié soene op haar blog gelaai het.
Van die vrywilligers wat Ya-ching met haar projek gehelp het is onder andere 'n fabriekswerker, 'n model, 'n Italiaanse toeris en selfs 'n soldaat wat die stad van liefde vir 'n dag besoek het.
"Ek het drie jaar gelede met die idee vorenedag gekom,” het sy op haar blog geskryf. "Drie van my vier vriende het my gewaarsku en gesê die kans is groter dat ek eerder geklap as gesoen gaan word.”
Ya-ching wat beplan om ‘n boek oor haar ervaring te skryf, het al meer as 1.97 miljoen besoekers op haar blog getrek. Maandag het haar blog meer as 224 000 besoekers gehad.
"Is jy nie bang jy tel siektes op nie?” het een van haar aanhangers gevra.
“Nee,” het sy gesê. “Hoe meer jy vrees, hoe minder bereik jy.”
- AFP