Blackberry-stilte was 'kernleierskapfout'
2011-10-16 07:05
Johannesburg – Die afgelope week se drie dag lange probleme met BlackBerry kan daartoe lei dat private gebruikers en sakeondernemings na ’n ander diens oorskakel.
Die tegnologietydskrif Wired berig die onderbreking in BlackBerry se e-pos-, internet- en kitsboodskapdiens het eers Afrika, Europa en die Midde-Ooste getref en toe na die VSA en Kanada uitgekring.
Hoewel die maatskappy beweer het die probleem is teen Donderdagmiddag opgelos, het derduisende BlackBerry-gebruikers sosiale netwerke soos Twitter en Facebook laat gons met hul woedende kommentaar toe hulle steeds geen diens kon kry nie.
Baie het gedreig om BlackBerry vir ’n ander diens te verruil.
Die onderbreking het gekom kort ná die bekendstelling van Apple se nuwe iPhone 4S, waarvan ’n miljoen binne ’n uur verkoop is.
Terselfdertyd het Apple se iCloud-diens en die iOS 5-bedryfstelsel hul buiging gemaak, Motorola het sy Atrix 2-slimfoon bekend gestel en Samsung sy Stratosphere – almal op ondernemings gemik.
Mike Lazaridis, mede-uitvoerende hoof van BlackBerry se bedryfsmaatskappy, Research in Motion (RIM), het ’n video uitgereik waarin hy sê: “Julle verwag beter van ons.”
Volgens Wired was veiligheid ’n groot verkoopspunt vir BlackBerry, maar maatskappye en instellings wat nie self besonder skerp veiligheidsmaatreëls het nie, sal toenemend wegbeweeg van BlackBerry.
Ander toestelle bied nie noodwendig die oplossing nie.
iPhones kan sakeondernemings duur te staan kom en Android-toestelle se data-veiligheid is ook nie altyd na wense nie.
Die Suid-Afrikaanse IT-kenner Arthur Goldstuck sê weens RIM se “gebrek aan deursigtigheid en toeganklikheid” is dit moeilik om te bepaal of BlackBerry se ondersteuningstelsel sulke probleme kan hanteer.
“Maar die mees verbasende aspek van die krisis is hoe RIM dit benader het. Hulle het plaaslike verteenwoordigers verbied om met die media of kliënte te praat en alle kommunikasie word deur die Britse kantoor behartig. Tot dusver het dié kommunikasie egter net uit kort verklarings bestaan.”
Goldstuck sê die drie grondreëls van krisisbestuur is “kommunikeer, kommunikeer, kommunikeer”. Daarmee saam moet die uitvoerende leierskorps deurlopend beskikbaar wees. “Dit is heeltemal afwesig in RIM se geval, wat dui op ’n kernleierskapfout, eerder as ’n ‘kernskakelaarfout’.”
Goldstuck voorspel beleggers gaan uiteindelik hul sin kry en daarin slaag om van Lazaridis en sy mede-uitvoerende hoof, Jim Balsillie, ontslae te raak.
– Volg Nuus24 op Twitter
- Rapport