BlackBerry 'nog ’n wyle onstabiel'
2011-10-14 07:01
Fanie van Rooyen, Sapa en Reuters
Johannesburg – Nagenoeg twee miljoen BlackBerry-gebruikers in Suid-Afrika het Donderdag, ná drie dae se digitale chaos, weer toegang tot van hul internetdienste gekry.
E-posse en BlackBerry Messenger (BBM)-boodskappe het Donderdag, al was dit soms nog uiters stadig, uiteindelik weer deurgekom.
Webblaaiery was egter vir groot gedeeltes van die dag steeds onmoontlik. Dít was nadat ’n probleem met ’n webbediener in Brittanje en ’n fout met ’n rugsteunstelsel ’n reuse-agterstand in boodskappe veroorsaak het wat nog nie uitgewis kon word nie.
Mike Lazaridis, stigter van Research in Motion (RIM), die vervaardigers van BlackBerry, het Donderdag in ’n videoboodskap op RIM se webtuiste, RIM.com, amptelik namens sy maatskappy om verskoning gevra.
Lazaridis kom terneergedruk en verleë in die video voor, en het gesê sy maatskappy het miljoene BlackBerry-gebruikers teleurgestel.
“Sedert die bekendstelling van BlackBerry in 1999 is dit my doelwit om aan die wêreld onmiddellike, betroubare kommunikasie te bied. Ons het dié week nie in ons doelwit geslaag nie. Nie eens naastenby nie,” het Lazaridis gesê.
“Ek vra om verskoning vir die diensonderbrekings van die afgelope week. Ons het baie van julle teleurgestel.
“Wees verseker ons werk dag en nag om dinge reg te maak. Julle verwag beter van ons en ek ook.
“Dit is nog te vroeg om te sê die probleem is volledig opgelos, maar ons ervaar byna normale dienste in Europa, die Midde-Ooste, Afrika en Indië.”
Lazaridis het gesê dienste kan vir ’n rukkie nog onstabiel bly soos wat die stelsel herstel.
Hoewel BlackBerry-dienste byna herstel is, is RIM se kopseer skynbaar nog lank nie verby nie.
Verskeie gebruikers en selfoondiensverskaffers het Donderdag begin wonder oor hoe geaffekteerde gebruikers vir die verlies aan dienste vergoed sal word.
Business Day het Donderdag berig BlackBerry-gebruikers moet die nasionale verbruikerskommissie nader omdat hulle volgens die Wet op die Beskerming van Verbruikers vir skadevergoeding kwalifiseer.
Al die partye wat in die waarde-toevoegingsketting betrokke was, kan volgens Mamodupi Mohlala, nasionale verbruikerskommissaris, aanspreeklik gehou word.
Mohlala het gesê gebruikers wat hul BlackBerrys ná April gekoop het, is daarop geregtig om hul fone in te ruil vir ’n ander slimfoon van dieselfde waarde omdat die dienste wat aan hulle belowe is nie gelewer is nie.
Virgin Mobile SA het Donderdag in ’n verklaring aangekondig dat sy lede volledig vergoed sal word vir die dae wat hulle geen toegang tot die BlackBerry-internetdiens (BIS) gehad het nie.
In Brittanje het Vodafone gesê daar is nog nie besluit hoe vergoeding gehanteer sal word nie, terwyl Spanje se Telefonica-diensverskaffer gesê het hy sal kliënte wél vergoed.
– Volg Nuus24 op Twitter
- Beeld