BlackBerry lei weer tot frustrasie
2011-10-27 07:01
Pretoria – Talle Vodacom-gebruikers wat BlackBerrys het, het waarskynlik Woensdagoggend onaangename terugflitse ervaar nadat hulle weer tydelik sonder BlackBerry-internetdienste (BIS) gelaat is.
Dit volg nadat BlackBerry-gebruikers sowat twee weke gelede weens ’n bedienerfout by Research in Motion (RIM), vervaardigers van BlackBerry, se datasentrum in Slough, Engeland, drie dae lank sonder internetdienste moes klaarkom.
Woensdag se BIS-onderbreking, wat skynbaar slegs deur sekere Vodacom-gebruikers in Gauteng ervaar is, was gelukkig van korte duur.
Richard Boorman, woordvoerder van Vodacom, het gesê die onderbreking het Woensdagoggend vroeg begin en is net ná 08:00 opgelos.
“Die oorsaak van die probleem was ’n bediener in Duitsland. Slegs sekere BlackBerry-gebruikers is egter daardeur geraak,” het Boorman gesê.
Hy het gesê dit is nog nie bekend of die bedienerprobleem aan Vodacom/Vodafone of RIM toegeskryf kan word nie.
“Ons is nog besig om die presiese oorsaak te ondersoek,” het hy gesê.
Jacqueline Boulos, ’n woordvoerder van RIM in Suid-Afrika, het Woensdag gesê sy is nie bewus van enige probleme aan die kant van RIM nie, maar dat sy wel bewus is dat sommige Vodacom-gebruikers probleme met hul BlackBerrys ervaar het.
Vodacom het Woensdag ongeveer 09:00 op sy Twitter-blad, @Vodacom, gesê die BB-kwessie is opgelos. “Ons vra om verskoning vir dié wat daardeur geraak is.”
– Volg Nuus24 op Twitter
- Beeld