BlackBerry-gebruikers mor weer
2011-10-12 08:05
Johannesburg – Miljoene BlackBerry-gebruikers in Afrika, die Midde-Ooste en Europa was Dinsdag woedend dat BlackBerry se internetdienste die tweede keer in twee dae ure lank onderbreek is.
Research in Motion (RIM), die vervaardigers van BlackBerry, het Dinsdag in ’n verklaring gesê ’n bediener-probleem by hul datasentrum in Slough, Engeland, het Maandag ’n onderbreking vir gebruikers in Europa, die Midde-Ooste en Afrika veroorsaak.
Daar is gesê die probleem is Dinsdagoggend opgelos. Enkele ure later, omstreeks 14:30, het die internet weer gegons nadat gebruikers opnuut sonder toegang tot e-pos, internet of BlackBerry Messenger (BBM) gelaat is. Ure voor die tweede onderbreking het RIM ’n wêreldwye verklaring uitgereik om te bevestig die diens is herstel.
“Ons vra om verskoning vir die ongerief wat gebruikers ervaar het,” lui dié verklaring.
“Inligting oor die oorsake van sulke probleme is selde onmiddellik beskikbaar. Die prioriteit is altyd eers om die dienste te herstel. Daarna word ’n ondersoek begin om die oorsaak te bepaal.”
Baie korporatiewe BlackBerry-kliënte het volgens BBC News se webtuiste, www.news.bbc.co.uk, gesê hulle het geen onderbrekings ervaar nie.
Dít dui glo daarop dat die probleem ontstaan het by die bedieners vir BlackBerry se sogenaamde BIS-diens, eerder as by die BlackBerry Enterprise-bedieners (BES).
Volg Nuus24 op Twitter
- Volksblad