Biotegnologie kan ekonomie dryf – minister
2009-07-23 16:06
Pretoria – Biotegnologie gaan waarskynlik die grootste dryfveer van die Suid-Afrikaanse ekonomie hierdie eeu word, het die minister van wetenskap en tegnologie, Naledi Pandor, gesê.
“Die 21ste eeu is die eeu van biologie,” het Pandor tydens ’n toespraak by die Nasionale Biotegnologie Werkswinkel vandag in Pretoria gesê.
Winste uit biotegnologie het tussen 2000 en 2007 meer as $100 biljoen (R769 biljoen) tot die Amerikaanse ekonomie bygedra, het die minister gesê. Dit verteenwoordig 2.5% van die land se bruto nasionale produk.
Hierdie wins is egter ingebring deur 250 000 mense, wat slegs ‘n sesde van ‘n persent van die land se totale werkende populasie verteenwoordig.
“Verkope uit die VSA se biotegnologie sektor was $50 biljoen (R382 biljoen) in 2003, terwyl verkope in dieselfde sektor in Suid-Afrika $290 miljoen (R2.2 miljard) beloop het,” het Pandor gesê.
Sy het beklemtoon dat die Suid-Afrikaanse regering die land se biotegnologie sektor moet uitbrei.
“Die Suid-Afrikaanse biotegnologie sektor is eenvoudig te klein,” het Pandor gesê.