Bioniese been slaag groot toets
2012-11-06 09:39
New York – Zac Vawter, 'n man wat een van sy bene in 'n motorfietsongeluk verloor het, het geskiedenis gemaak toe hy met behulp van 'n bioniese been wat deur sy brein beheer word, al die trappe van die Willis-toring in Chicago, met sy 103 vloere, geklim het.
Die kunsbeen, wat 'n motor-aangedrewe knie en enkel het, reageer op Vawkter se bewegings. Wanneer hy byvoorbeeld op die been druk om op te staan, druk die been terug om hom te help.
“Een van die grootste verskille vir my is die vermoë om trappe net soos enigiemand anders uit te klim," het Vawter in 'n verklaring gesê.
“Met my gewone prostese moet ek elke tree gee met my goeie voet eerste, waarna ek die kunsbeen dan moet oplig of vorentoe sleep.
“Met die bioniese been is dit eenvoudig. Ek klim die trappe soos ek dit altyd geklim het, en ek kan selfs twee op 'n slag klim.”
– Volg Nuus24 op Twitter.
