Bielie van 'n luislang gevang
2011-04-13 09:07
Pretoria - ’n Bielie van ’n luislang wat vermoedelik ’n swart rooibok ingesluk het, is Dinsdag deur natuurbewaarders op ’n plaas naby Pienaarsrivier, noord van Pretoria, gevang.
Gerhard Horn en Hencke Marais, natuurbewaarders van Tshwane-natuurbewaring, het dié luislang van meer as 4 m lank na die Kwalata-wildreservaat, naby Hammanskraal in die Dinokeng-Groot-Vyf-natuurreservaat verskuif.
Horn het gesê hulle is Dinsdagoggend genader deur die boere op dié plaas wat met verskillende soorte duur bokke, waaronder die seldsame swart rooibokke, teel.
“Hulle ly dus skade weens dié luislang wat dié bokke vang,” het Horn gesê.
Hy het gesê só ’n bok kos tussen R150 000 en R200 000.
Daar kan egter nie met sekerheid gesê word of dit wel ’n rooibok in die luislang se pens is nie.
Daar is besluit om die luislang by dié wildreservaat vry te laat omdat daar al die afgelope twee jaar navorsing oor luislange en pofadders gedoen word.
’n Slangkenner, prof. Graham Alexander van die Universiteit van die Witswatersrand, het dié klein navorsingsentrum daar begin vir sy navorsing wat in Junie afgehandel sal wees.
- Volksblad