Bespreek aanlyn plek vir dié kerkdiens
2013-01-18 16:21
Singapoer – Singapoer se New Creation-kerk het 'n aanlyn-besprekingstelsel vir sy Sondagdienste by sy nuwe 5 000-sitplekkerk bekend gestel.
Die besprekingswebwerf is verlede maand by die kerk, wat 25 000 lede sterk is, bekend gestel om lang rye by die nuwe gebou te verhoed. Die kerk het voorheen slegs 1 200 sitplekke gehad, het Matthew Kang, woordvoerder van die kerk, gesê.
"Ons het die eerste paar weke probleme gehad, maar ons het die situasie onder beheer gebring."
Elke kerklid kan 'n maksimum van vyf sitplekke bespreek vir die Sondagdienste, het Kang gesê.
"Dit is goed om te weet 'n mens kan sitplekke vooraf bespreek," het Jackie Leong, 'n gemeentelid, gesê.
"Ons word definitief verseker van 'n sitplek indien ons aanlyn bespreek en dit is beter so."
Die New Creation-kerk, wat in 1984 gestig is, is 'n nie-denominasionele, charismatiese kerk en word nie geaffilieer met enige ander oorsese kerke nie.
– Volg Nuus24 op Twitter
- Sapa-DPA
